Irazusta-Mujika bikoa, txapeldun!

Gibelalde-Satrustegi bikoari (36-40) irabazi zieten finala.

Ostiralean(19:00) jokatu zen Irurako Ametsa trinketean Gazte mailako Gipuzkoako Xare Txapelketaren finala. 

Finalaren atarikoan, Unai Gibelalde eta Mikel Satrustegi zirela  zertxobait faborito  finala irabazteko nioen,  baina Enaitz Irazustak eta Ander Mujikak ere aukerak bazituztela adierazi nuen, finaletan ezustekoak ere izan ohi direlako. 

Enaitz eta Ander oso ondo sartu ziren partidan, eta pixkanaka-pixkanaka markagailuan aldea irekitzen hasi ziren, eta partida erdira alde nabarmenarekin(11-20)  iritsi ziren. Hortik aurrera gauzak antzeko joan ziren azken hamarkadara arte (21-32). Hemendik aurrera,  partidak beste itxura bat hartu zuen; Enaitz eta  Ander zertxobait erlaxatu eta lasaitu egin ziren,  eta honek Unai jokoan gehiago sartzea ekarri zuen. Ondorioz, partida amaiera estutu egin zen(30-36/34-37/36-38), eta Unai eta Mikel berriro partidan ziren. Edozer gerta zitekeen; Enaitz eta Ander urduri samar,  eta Unai eta Mikel, berriz, motibazioz gainezka. Hala ere, Unaik eta Mikelek zailena egin eta gero, ez zuten euren lana ondo amaitzerik lortu,  eta  azken bi tantuak eginda, Enaitzek eta Anderrek partida (36-40) irabaztea lortu zuten.  

Amaitzeko, Etxeberria, Gipuzkoako Federakuntzaren ordezkariaren gidaritzapean,  Gorka Murua, Irurako Alkateak, Noelia Laraburu, zinegotziak,  eta Ametsa Pilota Elkarteko ordezkariek sariak banatu zituzten.