I. Irurako Ostatua Xare Irekiaren finalak, ostiralean

Ostiralean, ekainaren 13an(19:00) jokatuko dira Irurako Ametsa trinketean,  I. Irurako Ostatua Xare Irekiaren finalak. 

Lehen finala, Gazte mailakoa, Adei Gibelalde-Mikel Satrustegi bikoak

eta Eneko Larrañaga-Izei Garmendia bikoaren artekoa izango da. Oso partida irekia izatea aurreikusten da; ligaxkan elkarren kontra jokatutako partida, Adeik eta Mikelek irabazi bazuten ere,  bi jokoak oso lehiatuak eta estuak  izan ziren. Oraingoan ere horrela izatea espero da, bi bikoek antzeko maila daukatelako. 

Emaitzak emaitza, bi bikoek egun horretan eman zuten ikuskizuna ematen badute, gozatuko dugu. 

Nagusi mailako finala, berriz, Xuban Lopetegi-Gorka Huizi bikoak, Enaitz Irazusta-Oier Iturbe bikoaren kontra jokatuko dute. Partida hau ere irekia izatea espero da. Ligaxkan elkarren kontra jokatu zuten partidan, biko bakoitzak joko bana irabazita (1-1) amaitu zen. Hortaz, aurreko partida kontuan hartzen badugu, berdinketarik eman ez daitekeenez, kitarako joko bat izan dezakegu final nagusian. 

Xareko bi final handiren atarian gaude.  Hori dela eta, ostiralean trinketean espero zaituztegu, eta, gogoratu, finaletan ere Irurako Ostatuak ematen dituen  bi otordu, euro baten(1€) truke,  zozketatuko direla. 

Animatu! Espero zaituztegu!