Irazusta-Mujika, finalerdira!

Ostiral arratsaldean jokatu zen Ametsa trinketean Gazte mailako Gipuzkoako Xare Txapelketaren ligaxkako azken jardunaldiko lehen partidan, Irazusta-Mujika bikoak 40-35 irabazi zion Fernandez-Larrañaga bikoari. Ondorioz, Enaitz Irazustak eta Ander Mujikak finalerdia jokatzeko txartela lortu zuten. 

Tentsioa nabari zen partida aitzin pilotarien artean; asko zegoen jokoan, eta lau pilotariek horren jakitun ziren: txapelketan jarraitu edo kanpora . Haserako tantu gogor eta luze batzuk jokatu ondoren, lasaitu ziren lau pilotariak, eta oso partida lehiatua eta parekatua jokatu zuten. Enaitz eta Ander, alde handiegirik hartu gabe, aurretik izan  ziren markagailuan ia partida osoan.   Paulek eta Ibaik, ordea, azken hamarkadan, markagailua berdintzea(30-30) eta  aurrea hartzea ere (30-31) lortu zuten. Edozer gerta zitekeen, eta  amaiera estua, gogorra eta urduria izan zen, inork ez baitzuen galdu nahi.  Azkenean, Enaitzek eta Anderrek gehixeago asmatu zuten azken tantuetan, eta  garaipena( 40-35) lortu zuten. Ondorioz, hauek Txapelketan aurrera jarraituko dute, eta finalerdia jokatuko dute; Paule eta Ibai, berriz, Txapelketa ona egin badute ere, Txapelketari agur esan diote. Horrela da lehiaketa! Animo!