Xuban Lopetegi eta Markel Mujika xareko Gipuzkoako txapeldun!

Ostiral iluntzean Irurako Ametsa trinketean jokatu zen finala 40-35 irabazi zieten Matxalen Mendizabal eta Oier Iturberi.

Xuban eta Markel oso ondo sartu ziren  partiduan,  eta haseratik markagailuan aurrea hartu eta  bos pasei  tantuko abantaila hartzea  lortu zuten. Horrek eurei lasaitasuna eman zien, eta Matxalen eta Oier, alde hori ez zutela jaten ikusita,  zertxobait urduri jartzen hasi ziren. Hala ere, hauek  ez zuten etsi, eta kosta egin bazitzaien ere, asko ahaleginduta, partidaren azken hamarkadan berdintzea (30-30) lortu zuten.  Horrez gain,  partidan lehen aldiz aurrea hartzea(30-32) ere lortu zuten. Partida zegoen! 

Hemendik aurrera, berdinketak (32/33/34/35) eman ziren. Inork ez zuen galdu nahi, eta defentsibara, tantuari eustera, jokatzen hasi ziren. Xubanek eta Markelek berriro jokoaren nagusitasuna hartu zuten arte. Fisikoki Matxalen eta Oier baino hobeto bukatu zuten Xubanek eta Markelek, neurri batean partida aldeko haizearekin eraman zutelako, gastu gutxiago eginez. Azkenean, partida 40-35 irabazi zuten, eta, ondorioz, baita 2025eko maila Nagusiko Gipuzkoako Xare Txapelketa ere. Oro har, oso partida ona jokatu zuten lau pilotariek; irabazleak, biak oso ondo;  Xuban oso fin errematean, tantu asko bikain amaituz, eta defentsan ere sendo arituz.  Markel, berriz, oso seguru aritu zen atzealdean; pilota oso gutxi galdu zuen,  eta kantxa asko kubritu zuen.  Galtzaileak ere oro har ondo aritu ziren; Matxalen, ondo aritu zen defentsan,  baina ez zen hain fin aritu erasoan; bere alde esan behar dut, azken asteotan, ligaxkako partida batean, ukalondo inguruan, jasotako pilotakada bortitz bat dela medio ez zegoela ehuneko ehunean; eta Oier, berriz, bere ohiko jokotik beheraxeago ariru zen; defentsan ondo aritu bazen ere, erasoan ez zen ohi duen  eraginkortasunik  izan,  eta, horregatik,  ohi baino gutxiago dominatu ahal izan zuen partida. 

Amaitzeko, Gipuzkoako Euskal Pilota  Federazioko, Irurako Udaleko eta Ametsa Pilota Elkarteko ordezkariak bertan zirela,  sari banaketarekin eman zitzaion amaiera 2025eko  maila Nagusiko Gipuzkoako  Xare Txapelketari.