Ezin irekiago geratu da finala!

Ostiralean jokatu zen partidaren ostean, datorren ostiralean, apirilaren 11n, (19:00) Ametsa trinketean jokatuko den  Gipuzkoako Xare Txapelketaren final nagusia irekia baino irekiago geratu da. 

Ostiralean, Lopetegi-Mujika  eta Mendizabal-Iturbe bikoen artean jokatu zen ligaxkako azken jardunaldia, eta jokoan ezer ez bazegoen ere, bi bikoak finalerako sailkatuta zeudelako, finalaren aurrekari bezala hartu zuten pilotariek partida. Hori dela eta, serio demonio jokatu zuten lau pilotariek, finalari begira, aurkariei hortzak erakutsi nahian edo. Hala ere, ez zen partida ona izan;  tantu lehiatu eta ikusgarri batzuk jokatu bazituzten ere, huts gehiegi izan ziren,  eta jarraipenik ez zuen izan partidak.  Hori bai, markagailuko  parekotasunak,   azken tantura arte(39-39) mantendu zuen ikusmina eta urduritasuna, honek erabaki baitzuen partida. Azken tantua,  Xubanek eta Markelek egin zuten, eta partida(40-39)  irabazi.  

Atzoko emaitza ikusita, arestian esan moduan,  ostiralean, apirilaren 11n, (19:00) Irurako  Ametsa trinketean  jokatuko den Gipuzkoako Xare Txapelketaren finala ezin irekiagoa dagoela esan beharrik ez dago. 

Orain,  Irurarrek erantzutea baino ez da falta, eta ea xarea Irurarren altxor preziatua  izaten jarrai dezan ahalegin handia egiten ari diren pilotari hauek animatzera hurbiltzen zareten ostiralean trinketera. Merezi dute eta!