Gipuzkoa erraz nagusitu zaio Nafarroari!

GABNI Txapelketaren  xareko lehen jardunaldian Nafarroaren parte hartzea azken unera arte erabaki ez bazen ere, azkenean larunbat goizean Irurako Ametsa trinketean  jokatu zen, eta Gipuzkoak hiru partidak aise  irabazi zizkion Nafarroari. 

Gazte mailan, Ametsako  Unai Gibelalde eta Aitor Aristi izan ziren Gipuzkoako ordezkariak,  eta nagusitasun osoz irabazi zieten(40-20)  Pedroarena eta Arostegi  Nafarroako ordezkariei. 

Zuzen, sendo eta eraginkor   aritu ziren  Unai eta Aitor, eta nafar  ordezkariak baino gehiago izan ziren partidaren haseratik bukaeraraino. 

22. urtez azpiko mailan ere Ametsako   Xuban Lopetegik eta Markel Mujikak, Gipuzkoa ordezkatuz, garaipen erosoa (40-27) lortu zuten Montoya-Armendariz nafarren  kontra. Xubanek eta Markelek haseratik hartu zuten aldea markagailuan, eta horri esker, ausart, tantuak ondo amaituz,  eta, eutsi behar zenean eutsiz, estuasun handirik gabe jokatu zuten.

Nagusi mailan, Joxi Lopetegi(Behar Zana)eta Oier Iturbe(Ametsa)  izan ziren Gipuzkoa ordezkatu zuten pilotariak.   Hauek  are  errazago(40-16)  irabazi zieten Erro eta Ayesa nafar pilotariei.  Markagailuak ez dio gezurrik, eta Joxi eta Oier oso nagusi izan ziren. Elkarrekin gutxitan jokatu badute ere, Joxi eta Oier ondo moldatu ziren elkarrekin. Joxi beste maila batean dago,  eta, ondorioz, eroso jokatzen ditu maila honetako partidak. Hori dela eta, bere bikotekideari jokarazteaz gain, jokatzen ere uzten dio, pilota zailak kenduz, eta jokatzeko errazak utziz.  Oier ere bikain aritu zen, eta nafarrek zailtasunetan jarri zutenean, bikain eutsi zien haien erasoei.

Emaitza horiekin aurrera

pausu handia eman dute Gipuzkoako xare ordezkariek. Orain, Iparraldearen kontra jokatuko dute martxoaren 29an, Hazparnen .