Larronde-Sistiague garaile!

Etxeberri-Borteyru  mendean hartu zituzten(40-34) VII. San Migel Xare Irekiaren finalean.  

Beldurtu ginen Ametsa trinketera finala ikustera hurbildu ginen pilotazaleok, Jon Larronde eta Joel Sistiague partidaren lehen erdian 20-4 aurreratu zirenean;  emaitza hau ez zen ematen ari,  Sebas Etxeberri eta Oihan Borteyru gaizki jokatzen ari zirelako, Jon eta Joel  denean asmatzen ari zirelako baizik.    Atzetik zihoazen, Sebad eta Oihanen,  atsedenaldi  bat,  eta, batez ere,  pilota aldaketaren eraginez, partidak izugarrizko iraulia izan zuen, eta,  pixkana-pixkana,  Sebas eta Oihan jokoan bete-betean sartzea lortu  eta partida berriro ekartzea lortu zuten, partidaren azken hamarkada erabakiorrerako tantu bakar bat atzetik(32-31) jartzea lortuz.  Harri eta zur geunden ikusten ari ginenarekin, bai emaitzak izan zuen irauliarengatik, bai  xare jokoaren  ikusgarritasunagatik eta nola ez  lau pilotariak ematen ari ziren  ikuskizunagatik. 

Sebasek eta Oihanek zailena egin eta gero, alegia, partida ekartzea lortuta, bazirudien, pilotan, gutxitan, baina noizean behin  ematen diren irauli historiko horiekoren baten lekuko izango ginela, baina azkenean ez zen horrelakorik gertatu.  Jonek eta Joelek berriro  partidaren agintea hartzea lortu zuten, eta VII. San Migel Xare Irekiaren txapelak irabaztea lortu zuten.

Finalaren atarikoan, Irurako  neska xarelarien  partida jokatu zen. Alaine Larrarte-Paule Fernandez bikoak 2-0 (15-11/15-9) irabazi zion Sara Agirre-Irati Zabala bikoari. Ea Irurako neska gehiago animatzen den xarez jokatzera, eta xare eskolara hurbiltzen diren.

Ohi bezala,  sari banaketarekin eman zitzaion amaiera VII. San Migel Xare Irekia, Irurako Udala Sari Nagusiari. 

Bertan, Gorka Murua, Alkatea, Idoia Garaialde,  Kirol zinegotzia, Ibon Taberna( EEPFren ordezkaria), Ramuntxo Borteyru, (IPBaren ordezkaria) eta Jose Ramon Arruabarrena (SMG)  izan ziren.  

Azkenik, Irurako Udalak Oroigarri bana eman zien Argentinan(Venado Tuerto) jokatu berri den 23 urtez azpiko Munduko Euskal Pilota Txapelketan, Euskal Selekzioa ofizialki lehen aldiz  ordezkatu duten Oier Iturbe, Matxalen Mendizabal, Markel Mujika, Xuban Lopetegi eta euren hautatzailea izan den Mikel Uzkuduni.  

Hurrengo urtera arte!