San Migel Xare Irekia ate joka!

Etxeberri-Borteyru eta Larronde-Sistiage bikoen arteko partida izango da abiapuntu. 

Urtero bezala, San Migel jaiak hurbiltzean,   Ametsa Pilota Elkarteak eta Irurako Udalak elkarrekin antolatzen duten xareko torneorik garrantzitsuenetako bati begira jartzen gara irurarrok.  Aurten,  arrazoi desberdinengatik, ozta-ozta,   goi-mailako hiru bikote baino ezin izan  ditugu osatu: Jon Larronde-Joel Sistiague,  Joxi Lopetegi-Andoni Castera eta Sebas Etxeberri-Oihan Borteyru. 

Hori dela eta, hiru jardunaldiko ligaxka batera mugatu behar izan dugu, aurten,  zazpigarrena izango den San Migel Xare Irekia/ Irurako Udala Sari Nagusia. Hiru partidako ligaxka jokatu ondoren,  ligaxkan lehen eta bigarren sailkatuek finala jokatuko dute urriaren 4an. 

Lehen jardunaldia, irailaren 26an, ostiralean, 19:00etan,  jaietako etxaferua bota eta berehala,  jokatuko dute ETXEBERRI-BORTEYRU  eta   LARRONDE-SISTIAGUE bikoek. 

Partida bakarra  izango da, baina  arestian esan bezala, oso goi-mailakoa. Beraz, barrikoteko  lehen  platera prestatzen lanik ez; Ametsa trinketean eskainiko dizuegun xare partidarekin osatuta. Bertan espero zaituztegu. Ondo pasa San Mielak! 

 Gora San Migel!