Iparraldeak irabazi egin zion Gipuzkoari!

Iparraldeak irabazi egin zion Gipuzkoari!

GRABNIKo xareko 2.  jardunaldian Iparraldeak, 22 urtez azpiko eta Nagusi mailako partidak irabazi egin zizkion Gipuzkoari; Gipuzkoak, berriz, Gazte mailako partida irabazi zion Iparraldeari.  

Ondo hasi zen jardunaldia Gipuzkoako ordezkarientzat;  Unai Gibelaldek eta Xuban Lopetegik 35-40 irabazi zieten Iparraldeko  Simon Bross eta Illan Jauregiberriri.

Partida orekatua izan zen, eta lau pilotariak ondo aritu ziren, oso joku ona eginez. Unairi eta Xubani kosta egin zitzaien haseran trinkete berrira egokitzea, baina hori lortutakoan,  erabat nagusitzea lortu ez bazuten ere, markagailuan aurretik izan ziren partida guztian (17-20/20-25/27-30/30-33). Azken tantuetan Unaik eta Xubanek sendo jarraitu zuten, eta gehixeago asmatuta, partida(35-40) irabaztea lortu zuten. Ondorioz, Gipuzkoak, garaipen honekin, GRABNIko Gazte mailako xareko finalean izateko txartela lortu zuen.  Zorionak!

Bigarren partidan, 22 urtez azpiko mailan, Hodei Ondarts eta Jon Lafarge Iparraldeko ordezkariak erraz (40-9) nagusitu zitzaizkien Matxalen Mendizabal  eta Aitor Aristi Gipuzkoako ordezkariei. Hodei eta Jon oso nagusi izan ziren partida osoan, markagailuak erakusten duen moduan; Matxalen eta Aitor saiatu baziren ere,  ezinean aritu ziren, ezin izan zuten ezer egin Hodei eta, batez ere, Jonen joku erauntsiaren aurka. Triste eta burumakur amaitu zuten partida Matxalenek eta Aitorrek, baina dena ez dago galduta.

Emaitza honekin Iparraldeak ia ziurtatua du GRABNIko xareko finaleko txartela. Espero dezagun Iparraldeko ordezkariek,  azken jardunaldian,  Nafarrei ere irabaztea.  Horrela bada, Gipuzkoa ere finalean izango  litzateke 22 urtez azpiko mailan, Nafarroari irabazi egin ziolako Gipuzkoak. 

Jardunaldiko hirugarren partida, Nagusi mailakoa, jokatu zen hurrena. Iparraldeko Matti Borteyruk eta Andoni Casterak , Gipuzkoako Joxi Lopetegi eta Oier Iturberen kontra jokatu zuten; ahal handiko bi bikote nor baino nor. 

Iparraldeko ordezkariak -Matti eta Andoni-  oso gogor hasi ziren, eta joku sendo eta erasokorra eginez, haseratik hartu zuten aldea markagailuan. Joxik eta Oierrek ez zuten etsi, baina Matti eta Andoni oso sendo, zirrikiturik gabe, aritu ziren partida osoan, eta gureek ez zuten lortu iparraldeko bikoa haustea. Hori dela eta,  garaipen erosoa(40-24) lortu zuen Borteyru-Castera bikoak. 

Nagusi mailako GRABNIko finalari begira, Iparraldeak urrats handia eman du bertan izateko. Espero dezagun, Gipuzkoak Nafarroari izabazi egin zionez, Iparraldeak Nafarroari ere irabaztea, Gipuzkoa finalean izateko. 

Hortaz,  22 urtez azpikoan eta Nagusi mailakoan  Nafarroa vs Iparralde jardunaldiaren zain geratu beharko dugu Gipuzkoarrok.